Saturday, November 20, 2010

Bookmark and Share

തൊമ്മനെന്തിനാ പെണ്ണ്?

രാവിലെ ഒരു ഫോണ്‍.

ഫോണ്‍: 'ഹലോ...അപ്പച്ചനല്ലേ?'

ഞാന്‍: 'യെസ്..സ്പീകിംഗ്'

'ഞാന്‍ സാഗര്‍ കോട്ടപ്പുറം, നോവലിസ്റ്റ്. അച്ചായന്‍ എനിക്കൊരു ഉപകാരം ചെയ്യണം.'

'സാഗര്‍ പറഞ്ഞോളൂ'

സാഗര്‍: 'എനിക്കൊരു കഥ പറഞ്ഞു തരണം.'

ഞാന്: '
തനിക്കു പറ്റിയ പൈങ്കിളി ഐറ്റമൊന്നും എന്റെയടുത്തില്ല.

സാഗര്‍: '
'അച്ചായന്‍ ഏതെങ്കിലുമൊരു കഥ തന്നാല്‍ മതി, ഞാനത് വളച്ചൊടിച്ച് എഴുതിക്കൊള്ളാം.'

ഞാന്‍: 'ഫോണില്‍ ക്കൂടി പറഞ്ഞാല്‍ മതിയോ?'

സാഗര്‍: '
! ധാരാളം മതി.'

ഞാന്‍
: 'എന്നാല്‍ എഴുതിക്കോളൂ.. കമലേച്ചിയുടെ( മാധവിക്കുട്ടി) 'അന്ന'യോളം സൌന്ദര്യമില്ലെങ്കിലും, എന്റെ വീട്ടിലും ഒരു പെണ്‍പട്ടിയുണ്ട്. പേര് ജൂലിയറ്റ്. നേരം പുലരുമ്പോഴേക്കും നാലഞ്ചു ശുനക റോമിയോമാര്‍ ക്ഷേമാന്വേഷണങ്ങളും ആയിട്ട് കൂടിനടുത്തെത്തും. എത്ര നേരം വേണമെങ്കിലും, ക്ഷമയോടെ അവര്‍ കാത്തു കിടക്കും. എപ്പോഴെങ്കിലും നമ്മള്‍ കൂടു തുറന്നാല്‍, ഇവന്മാര്‍ ജൂലിയട്ടിനെയും കൊണ്ട് പമ്പകടക്കും. അവസ്ഥയാണ്..'

സാഗര്‍: 'അച്ചായന്‍ തമാശ കളയൂ.. പ്ലീസ്, കഥ പറയൂ.'

ഞാന്‍ : 'അത് തന്നെ ആണെടോ ഞാന്‍ ചെയ്തുകൊണ്ടിരിക്കുന്നത്. ങ്ങാ.. അവസ്ഥയാണ് നമ്മുടെ തൊമ്മന്റെ വീട്ടില്ലും. ഇനി തൊമ്മനെക്കുറിച്ച് ചുരുക്കിപ്പറയാം. വീട്ടിക്കുറ്റിക്കു കരിഓയില്‍ അടിച്ചതുപോലെ, നല്ല ഭംഗിയുള്ള നിറം. വയസ്സ് മുപ്പത്തഞ്ച്‌. അവിവാഹിതന്‍. ചെറുപ്പത്തിലേ മാതാപിതാക്കള്‍ നഷ്ട്ടപ്പെട്ടു, കോട്ടയത്തുള്ള, പിതൃ സഹോദരനാണ് വളര്‍ത്തിയത്. ഒരാളോളം വളര്‍ന്നപ്പോള്‍, മലബാറിന് വണ്ടി കയറി. ഞങ്ങളുടെ അടുത്ത് ഒരു മലമുകളില്‍, ഒരേക്രയോളം സ്ഥലവും, ഒരു ചെറിയ വീടുമുണ്ട്. ആരാന്റെ സ്ഥലം പാട്ടത്തിനെടുത്ത് ഇഞ്ചികൃഷിയും, ചിലപ്പോള്‍ കൂലിപ്പണിയും ആയിട്ട് സുഖമായിട്ടു ജീവിക്കുന്നു.

ഇടക്കൊരു സ്വകാര്യം പറയട്ടെ! തൊമ്മനൊരു വിശിഷ്ട സ്വഭാവമുണ്ട്. എന്തും, ഏതും, Secondhand . ആണ് തൊമ്മനിഷ്ട്ടം. സെക്കന്റ് ഹാന്റ് വാച്ച്, സെക്കന്റ് ഹാന്റ് റേഡിയോ, സെക്കന്റ് ഹാന്റ് സിഗരറ്റ് ലാമ്പ് എന്നിങ്ങനെ. 'വിശന്നു വിശന്നിരുന്നപ്പോള്‍ ഒരു ഞണ്ട് കയറിവന്നു' എന്നു പറഞ്ഞതുപോലെ, തൊമ്മന് കോട്ടയത്ത് നിന്നൊരു കത്ത് കിട്ടി.

എത്രയും പ്രിയ തൊമ്മന്,
കത്ത് കിട്ടിയാല്‍ ഉടനെ നീ ഇത്രറ്റം ഒന്ന് വരണം. നിന്റെ കല്യാണം ഞാന്‍ ഉറപ്പിച്ചു. പതിനാറു പവനും, ഇരുപതിനായിരവും കിട്ടും. പ്രീ ഡിഗ്രി വരെ പഠിച്ചിട്ടുണ്ട്. പ്രായം കൊണ്ടും നിനക്ക് ചേരും. അവനവന്റേതു അല്ലാത്ത കാരണം കൊണ്ട് വിവാഹമോചനം നേടിയ കുട്ടിയാണ്, സാരമാക്കേണ്ട. ബാക്കി നേരില്‍ പറയാം.
എന്നു, സ്വന്തം പേരപ്പന്‍. (ഒപ്പ്)

കെട്ടാന്‍
പോകുന്ന പെണ്ണും സെക്കന്റ് ഹാന്റ് ആണെന്നറിഞ്ഞപ്പോള്‍, തൊമ്മന് പെരുത്ത് സന്തോഷം! സംഗതികള്‍ വച്ചു താമസിപ്പിക്കേണ്ട എന്നു കരുതി, തൊമ്മന്‍ കോട്ടയത്തേക്ക് യാത്ര തിരിച്ചു.'

സാഗര്
: 'സസ്പെന്‍സ് ആണോ അച്ചായാ?'

ഞാന്
: ' അത്, മുഴുവന്‍ കേട്ടിട്ട് താന്‍ തന്നെ തീരുമാനിച്ചാല്‍ മതി. ബാക്കി കൂടി എഴുതിക്കോ. കല്യാണവും, ആഘോഷമായ അതുമിതും കഴിഞ്ഞു, നവ(?)വധുവിനെയും കൂട്ടി, തൊമ്മന്‍ തിരിച്ചു മലബാറിലെത്തി. മലബാറിലെ മണ്ണില്‍ കാലു കുത്തിയതും, പ്രശ്നങ്ങള്‍ തലപൊക്കിയതും ഒരുമിച്ചായിരുന്നു.
തൊമ്മന്‍ പുറത്ത് എന്തെങ്കിലും ജോലിക്ക് പോകുന്ന തക്കം നോക്കി, സ്ഥലത്തെ പ്രധാന ദിവ്യന്മാരായ റോമിയോമാര്‍, ശോശാമ്മയുടെ  (Mrs. Thomman) ക്ഷേമം അന്വേഷിക്കനെത്തും. പുതിയ സ്ഥലവും, പുതിയ ആള്‍ക്കാരും. ശോശാമ്മയായിട്ടു ആരോടും, ധിക്കാരമോ, മാന്യതക്കുറവോ പ്രവര്‍ത്തിച്ചില്ല! തൊമ്മന്‍ ആകെക്കൂടി വിഷമത്തിലായി. ജോലിക്ക് പോയില്ലെങ്കില്‍ കുടുംബം പട്ടിണിയാകും. ജോലിക്ക് പോയാല്‍ ചിലപ്പോള്‍ ശോശാമ്മ, തന്റെതല്ലാത്ത കാരണത്താല്‍ വീണ്ടും..?

ആലോചിക്കും തോറും പ്രശ്നം കൂടുതല്‍ വഷളാകുന്നത് പോലെ. കുറെയെല്ലാം കണ്ടില്ലെന്നു നടിച്ച്, മൂന്നു മാസങ്ങള്‍ മുന്നോട്ടു പോയി. ഒരു ദിവസം രാവിലെ, ശോശാമ്മക്കു കലശലായ ദേഹാസ്വസ്ഥ്യം! പുറത്ത് കാണാന്‍ വയ്യാത്ത പല പല രോഗങ്ങള്‍! രണ്ടു പേരും കൂടി മലയിറങ്ങി, പത്തു കി.മി. അകലെയുള്ള ആശുപത്രിയിലേക്ക് പോയി. ഡോക്ടര്‍ തിരിച്ചും മറിച്ചും പരിശോധിച്ചിട്ട്, അഡ്മിറ്റ്‌ ആക്കി.

"
മഞ്ഞപ്പിത്തത്തിന്റെ ആരംഭം ഉണ്ടെന്നു തോന്നുന്നു, ഒരാഴ്ച കിടക്കേണ്ടി വരും"ഡോക്ടര്‍ പറഞ്ഞു.

"നിങ്ങള്‍ ഒരാഴ്ച വെറുതെ ഇവിടെ നിന്നാല്‍, വീടിലെ എല്ലാ കാര്യങ്ങളും അവതാളത്തിലാകും. അത് കൊണ്ട്, നിങ്ങള്‍ വീട്ടിലോട്ടു ചെല്ല്. ഇടയ്ക്കു വന്നാല്‍ മതി." ശോശാമ്മ പറഞ്ഞത് ശരിയാണെന്ന് തൊമ്മനും തോന്നി.

ആശുപത്രിയില്‍
നിന്ന് ഇറങ്ങിയ ഉടനെ തന്നെ, ശോശാമ്മയെ ആശുപത്രിയില്‍ ആക്കിയ വിവരത്തിന്, ശോശാമ്മയുടെ ഒരേ ഒരാങ്ങളക്ക് ഒരു കത്തെഴുതിയിടാന്‍ തൊമ്മന്‍ മറന്നില്ല. മൂന്ന് ദിവസം ഇഞ്ചിക്കൃഷി പരിപാലനവുമായിട്ടു തൊമ്മന്‍ മലയില്‍ നിന്നു. നാലാം ദിവസം തൊമ്മന്‍ ആശുപത്രിയിലെത്തിയപ്പോള്‍, ശോശാമ്മ കിടന്ന ബെഡ് ശൂന്യം! നേരെ ചെന്നൂ ഡോക്ടറുടെ അടുത്തേക്ക്.

"അവരുടെ ആങ്ങള വന്ന് ബില്ലടച്ചു. നാട്ടില്‍ കൊണ്ടുപോയി അവിടെ പച്ചമരുന്നു (ഒറ്റമൂലി) കൊടുക്കാനാണെന്ന് പറഞ്ഞു, അപ്പോള്‍ ഞാന്‍ ഡിസ്ചാര്‍ജ് ചെയ്തു."ഡോക്ടര്‍ പറഞ്ഞു.
"അതേതായാലും നന്നായി" എന്നും പറഞ്ഞ് ഇറങ്ങിയ ഉടനെ തന്നെ, ശോശാമ്മയുടെ ആങ്ങളക്ക് ഒരു കത്തും കൂടി എഴുതി പോസ്റ്റ്‌ ചെയ്തു. കത്തിന്റെ ഉള്ളടക്കം ഇങ്ങനെയായിരുന്നു.

പ്രിയ
അളിയന്,
ശോശാമ്മയുടെ  അസുഖമൊക്കെ കുറഞ്ഞു എന്നു കരുതട്ടെ! അവള്‍ അളിയന്റെ അടുത്ത് കുറച്ചു ദിവസം വിശ്രമിക്കട്ടെ. ക്ഷീണം എല്ലാം മാറുമ്പോള്‍ ഞാന്‍ വന്ന് കൂട്ടിക്കൊണ്ടു പോരാം.
എന്ന്
അളിയന്‍, തൊമ്മന്‍. (ഒപ്പ്)'

സാഗര്‍: 'അച്ചായാ, സസ്പെന്‍സ്!'
ഞാന്‍
: 'ഒന്ന് മിണ്ടാതിരിയെടോ. എന്റെ മൂഡ്‌ കളയാതിരുന്നാല്‍, ബാക്കി കൂടി പറയാം. കേട്ടോളൂ.

മൂന്നു നാല് ദിവസം കഴിഞ്ഞു കാണും, വീടിനു താഴെ ഒരു ജീപ്പ് വന്നു നിന്നു. ശോശാമ്മയുടെ  ആങ്ങള, ജീപ്പില്‍ നിന്നു ഇറങ്ങിയിട്ട്, തൊമ്മനെ വിളിച്ചു.
"
അളിയാ, പെട്ടെന്ന് തുണി മാറി ഇറങ്ങി വാ. നമുക്ക് ഒരിടം വരെ പോകാനുണ്ട്."
"ശോശാമ്മക്ക് എങ്ങനെയുണ്ട്?" തൊമ്മന്‍ ചോദിച്ചു.
"കുഴപ്പമൊന്നുമില്ല, സുഖമായിരിക്കുന്നു. അളിയന്‍ പെട്ടെന്ന് ഇറങ്ങ്. എനിക്ക് ഇന്ന് തന്നെ കോട്ടയത്തിനു പോകാനുള്ളതാണ്." അളിയന്‍ പറഞ്ഞു.
"
എനിക്ക് ചെറിയ ഒരു ജാമ്യം ഒപ്പിട്ടു തരണം. എന്റെ പേരില്‍ ഒരു പെറ്റിക്കേസ് ഉണ്ട്. ഇവിടെ എനിക്കു പരിച്ചയക്കാരില്ലാത്തത് കൊണ്ട് ഒരു പോലീസുകാരനേയും കൂട്ടി എന്നെ ഇങ്ങോട്ട് വിട്ടതാണ്. ഒരൊപ്പിട്ട് കൊടുത്താല്‍ ഉടനെ അളിയന് ഇങ്ങോട്ട് തിരിച്ചു പോരാം." അയാള്‍ കൂട്ടിചേര്‍ത്തു.

രണ്ടുപേരും കൂടി --  പോലിസ് സ്റ്റേഷനില്‍ എത്തി, എസ് യുടെ മുന്നില്‍ ചെന്നു നിന്നു.
"മാമച്ചന്‍ ഇരിക്ക്." എസ് , ശോശാമ്മയുടെ ആങ്ങളയോട് പറഞ്ഞു.
"തൊമ്മന്‍, അല്ലെ?"എസ് .
"അതെ സര്‍." തൊമ്മന്‍ പറഞ്ഞു. തൊമ്മനെ അടിമുടിയൊന്നു നോക്കിയിട്ട്, എസ് തുടര്‍ന്നു.
"
അപ്പഴേ തൊമ്മാ, എനിക്കു വളരെ ലളിതമായ ഒരു ചോദ്യമുണ്ട്. അതിന്, നേരെ ചൊവേ ഒരുത്തരം തന്നാല്‍, തൊമ്മന് പോകാം. നീയാ പെണ്ണിനെ എന്ത് ചെയ്തു?"
"
ഏതു പെണ്ണിനെ സര്‍?" തൊമ്മന് ഒന്നും മനസ്സിലായില്ല.
" ഇനി അതും ഞാന്‍ തന്നെ പറയണോ പൂ...മാനമേ? നിന്റെ ഭാര്യ, എന്നുവച്ചാല്‍, ഇരിക്കുന്ന മാമച്ചന്റെ പെങ്ങള്‍ ശോശാമ്മ. ഇപ്പോള്‍ മനസിലായോടാ നിനക്ക്?" എസ് അലറി.
"സര്‍, ശോശാമ്മ  കോട്ടയത്ത്‌ അവളുടെ വീട്ടിലുണ്ട്." തൊമ്മന്‍ കരച്ചിലിന്റെ വക്കത്തെത്തി.
" സര്‍, കല്യാണം കഴിഞ്ഞു രണ്ടുപേരും കൂടി മലബാറിന് പോന്നതാണ്. അതില്‍പ്പിന്നെ, പെങ്ങളെ ഞാന്‍ കണ്ടിട്ടില്ല. കത്ത് കിട്ടിയപ്പോള്‍, എനിക്കു ആകെയൊരു പന്തികേടു തോന്നി. ഞാന്‍ അപ്പോള്‍ തന്നെ കോട്ടയത്ത് നിന്നു പുറപ്പെട്ടു. ബാക്കി സാറിനു അറിയാമല്ലോ." മാമച്ചന്‍  പറഞ്ഞു.
"സത്യം പറയെടാ, നീ അവളെ കൊന്നോ?" എസ് യുടെ ചോദ്യം.
"എന്റെ പോന്നു സാറേ, ദൈവദോഷം പറയല്ലേ, ആങ്ങള, കൂട്ടിക്കൊണ്ട് പോയതാണ്. ഇതിലപ്പുറം ഒന്നും എനിക്കറിയില്ല, ഇത് സത്യം." തൊമ്മന്‍ കരഞ്ഞു കൊണ്ട് പറഞ്ഞു.

എസ്
ചാടി എഴുന്നേറ്റതും, തൊമ്മന്റെ കാരണം പുകഞ്ഞു, കണ്ണില്‍ക്കൂടി പല നിറങ്ങളില്‍, നക്ഷത്രങ്ങള്‍ മിന്നി മറഞ്ഞതും ഒന്നിച്ചായിരുന്നു. കണ്ണില്‍ ഇരുട്ട് കയറി.
" മാമച്ചന്‍ പോയിട്ട് നാളെ രാവിലെ എന്നെ വിളിക്ക്. ഞാന്‍ ഒന്ന് അന്വേഷിക്കട്ടെ." ഒരു പോലീസ് കാരനോട്‌, "ഇവനെ കൂട്ടിലോട്ടിട്"എന്നും പറഞ്ഞു.

ലോക്കപ്പില്‍ കയറ്റിയപ്പോള്‍, താന്‍ ചതിക്കപ്പെട്ടു എന്നു തൊമ്മന് മനസ്സിലായി. സകല പുന്യാളന്മാരെയും വിളിച്ചു പ്രാര്‍ഥിച്ചു. ഫലമുണ്ടായില്ല എന്നു മാത്രമല്ല, എസ് കൂടിലേക്ക് കയറി വന്നു. തൊമ്മനെ തിരിച്ചിട്ടും, മറിച്ചിട്ടും എസ് ചോദ്യങ്ങള്‍ ചോദിച്ചു. ഉത്തരങ്ങളുടെ അഭാവത്തില്‍, കൈ കാലുകള്‍ കൊണ്ടും ചോദ്യങ്ങള്‍ ആവര്‍ത്തിച്ചു. ക്യാ ഫലം? "ഞാന്‍ ഇനിയും വരാം" എന്നു പറഞ്ഞ്, എസ് റിലാക്സ് ചെയ്യാന്‍ പോയി.

"ഗീവര്‍ഗ്ഗീസ് പുണ്യാളന്‍ പാമ്പില്‍ നിന്ന് രക്ഷിക്കും, ദേവസ്യാനോസ് പുണ്യാളന്‍ രോഗങ്ങളില്‍ നിന്ന് രക്ഷിക്കും, പോലീസ് മറുതകളില്‍ നിന്ന് എന്നെ രക്ഷിക്കാന്‍, ഭൂമുഖത്ത് ഒരു പുണ്യാളനും ഇല്ലേ, എന്റെ കര്‍ത്താവേ?"തൊമ്മന്‍ മനസ്സുരുകി പ്രാര്‍ഥിച്ചു.
തൊമ്മന്റെ പ്രാര്‍ത്ഥന കര്‍ത്താവ് കേട്ടു, എന്നു തോന്നുന്നു. സന്ധ്യയോടു കൂടി, മധ്യ വയസ്കനായ ഒരു പോലീസുകാരന്‍, ഒരു ചോറ് പൊതിയുമായിട്ടു തൊമ്മനെ സമീപിച്ചു.
"
നീ ഭക്ഷണം കഴിക്ക്. ഭൂലോക പുലിവാലെല്ലാം ഒപ്പിച്ചിട്ട് കെടക്കുന്നു, പുല്ലന്‍!" പോലീസിന്റെ ധാര്‍മ്മിക രോഷം.

രാവിലെ മുതല്‍ പട്ടിണിയാണ്. തൊഴി കിട്ടിയത് കൊണ്ട് വയറു നിറയുകയില്ലല്ലോ!. തൊമ്മന്‍ ഭക്ഷണം കഴിക്കാന്‍ തുടങ്ങി. ചോദ്യം ചെയ്യലിന്റെ പരിണിത ഫലമായിട്ട്‌, ചോറ് ആമാശയത്തിലേക്ക് പോകാന്‍ വിസമ്മതിച്ചു.

" നിന്റെ നാട് എവിടെയാടാ?" പോലീസ്.
"കോട്ടയത്ത്., ഈരാട്ടുപേട്ടയടുത്താ." തൊമ്മന്‍.
"ഞാനും നാട്ടുകാരനാ. നീ ഒള്ള സത്യം പറ, എന്താണ് ഉണ്ടായത്?"പോലീസ്.
ഉണ്ടായ
സംഭവങ്ങളെല്ലാം വള്ളി പുള്ളി വിടാതെ തൊമ്മന്‍ ആവര്‍ത്തിച്ചു.
" നീ ഭാര്യയെ അഡ്മിറ്റ്‌ ആക്കിയ ആശുപത്രിക്കാരുടെ മൊഴി പോലെയിരിക്കും, നിന്റെ ഭാവി. നീ തമ്പുരാനോട്‌ മുട്ടിപ്പായി പ്രാര്ത്തിച്ചിട്ട് കിടന്നുറങ്ങിക്കോ. നിന്നെ ഇന്നിനി ആരും ഉപദ്രവിക്കാതെ ഞാന്‍ നോക്കിക്കൊള്ളാം. നിന്നെ നാളെ മലപ്പുറം  പോലീസിനു കൈമാറും. നീ മലപ്പുറം ജില്ലക്കാരന്‍ ആയതു കൊണ്ട്, അവരാണ് കേസ് കൈകാര്യം ചെയ്യേണ്ടത്."
ഇങ്ങനെ പറഞ്ഞിട്ട് പോലീസുകാരന്‍ പോയെങ്കിലും, മലപ്പുറം പോലീസിന്റെ ഇടി മനസ്സിലോര്ത്ത്തപ്പോള്‍, തൊമ്മന് ഉറങ്ങാന്‍ കഴിഞ്ഞില്ല.

രാവിലെ
പത്തു മണിയോട് കൂടി, ---  പോലീസുകാര്‍ തോമ്മനെയും, കേസുകെട്ടുകളും മലപ്പുറം  സ്റ്റേഷനില്‍ എത്തിച്ചു.
"നീ വല്യ പുള്ളിയാണ് അല്ലേ? കരിവീട്ടി പോലെയുണ്ടല്ലോടാ? ങാ.. നീ പുറത്ത് നില്‍ക്ക്. ഞാനീ കടലാസ്സുകള്‍ ഒന്ന് നോക്കട്ടെ, എന്നിട്ട് തുടങ്ങാം." "കര്‍ത്താവേ, എന്നെ ഇനീം ഉപദ്രവിക്കല്ലേ" എന്നും മനസ്സില്‍ പറഞ്ഞ് തൊമ്മന്‍ പുറത്തിറങ്ങിയതും, ഒരു പോലീസുകാരന്‍ തൊമ്മനെ ലോക്കപ്പില്‍ കൊണ്ട് പോയി അടച്ചിട്ടു. അര മണിക്കൂര്‍ കഴിഞ്ഞപ്പോള്‍, ഒരു പോലീസുകാരന്‍ വന്ന് തൊമ്മനെ എസ് യുടെ അടുത്ത് എത്തിച്ചു.

"തൊമ്മാ.. എന്തോന്നാടാ ഇതൊക്കെ? നീ അവളെ എന്താടാ ചെയ്തെ?" എസ് .
നടന്ന
സംഭവമെല്ലാം ഒരു വട്ടം കൂടി തൊമ്മന്‍ ആവര്‍ത്തിച്ചു.

" തൊമ്മാ നിന്നെ ഞാന്‍ എന്താ ചെയ്യണ്ടേ? നീ ഒരു കാര്യം ചെയ്യ്; വീട്ടില്‍ പോയി ഒന്ന് കുളിച്ചു വിശ്രമിക്ക്. എന്നിട്ട്, നാളെ രാവിലെ പത്ത് മണിക്ക് ഇങ്ങോട്ട് വരണം. എന്റെ സ്വന്തം ജാമ്യത്തിലാ ഇപ്പോള്‍ നിന്നെ ഞാന്‍ വിടുന്നത്. നീ എന്നെ, വെറുതെ മല കയറ്റരുത്. വണ്ടിക്കൂലിക്ക് ഇത് വച്ചോ!" എന്നും പറഞ്ഞ്, എസ് പോക്കറ്റില്‍ നിന്ന് ഒരു പത്ത് രൂപയും കൊടുത്തു തൊമ്മനെ വിട്ടു.

തൊമ്മന്
സ്വന്തം കാതുകളെയും, കണ്ണുകളെയും വിശ്വസിക്കാന്‍ പറ്റിയില്ല.
"പട പേടിച്ചു പന്തളത്ത് ചെന്നപ്പോള്‍....അവിടെ ഒന്നും സംഭവിച്ചില്ല! ഇതെന്തു മറി മായം?" എന്നും വിചാരിച്ചു, തൊമ്മന്‍ വീട്ടിലേക്കു പോയി.

പിറ്റേന്ന്
കൃത്യം പത്തുമണിക്ക് തന്നെ, തൊമ്മന്‍ എസ് യുടെ മുന്നില്‍ ഹാജരായി.
"തോമ്മനെന്തിനാടാ പെണ്ണ്?" എസ് ചിരിച്ചു കൊണ്ട് ചോദിച്ചു.
".!?*"
"അവള്‍ പോയതില്‍ നിനക്ക് വിഷമമുണ്ടോ?"എസ് .
"ഉണ്ട് സര്‍." തൊമ്മന്‍.

"മര മണ്ടന്‍.. അവള് പോയ വഴിക്ക് പോട്ടെടാ.. ജാത്യാലുള്ളതു തൂത്താല്‍ മാറുകേല. അവള് പണ്ടേ ആള് പെരിശാണെന്ന്, ഞങ്ങള്‍ അവളുടെ നാട്ടില്‍ അന്വേഷിച്ചപ്പോള്‍, വിവരം കിട്ടി. അവള്‍ ആരുടെയോ കൂടെ ഒളിച്ചോടിയതാണ്‌. അവള് അവളുടെ പാട്ടിനു പോട്ടെടാ. 'അവളുടെ ആങ്ങള വന്ന് കൂട്ടിക്കൊണ്ടു പോയി' എന്നുള്ള, ആശുപത്രിയിലെ മൊഴിയാണ് നിന്നെ രക്ഷിച്ചത്‌. ഇനിയെങ്കിലും ഇതുപോലെയുള്ള മണ്ടത്തരങ്ങളില്‍ പോയി ച്ചാടാതെ ശ്രദ്ധിക്ക്. ഒരു പോത്തിന്റെ വലിപ്പമുണ്ടായിട്ടെന്താ..തലക്കകത്ത് ആള്‍താമസം വേണ്ടേ? ങാ... പൊയ്ക്കോ."
     പോലീസില്‍ നിന്ന് രക്ഷിക്കുന്ന പുണ്യാളന്മാര്‍ ഇല്ലെങ്കിലും, പോലീസില്‍ ചില പുണ്യാളന്മാര്‍ ഉണ്ടെന്നു തൊമ്മന് ബോധ്യപ്പെട്ടു. ഇനി മേലില്‍ കല്യാണത്തിനും, കച്ചേരിക്കും ഇല്ലെന്നു പ്രത്ജ്ഞ എടുത്തു തൊമ്മന്‍ സ്റ്റേഷന്‍ വിട്ടു.
സാഗര്‍: 'നന്ദി അച്ചായ. വളരെ നന്ദി'
ഞാന്‍: ' അത് പോരല്ലോ സാഗറെ, വൈകിട്ടെന്താ പരിപാടി? നമുക്കൊന്ന് കൂടണ്ടേ?'
സാഗര്
:' ക്കെ. ഞാന്‍ റെഡി.'

19 comments:

Anonymous said...

achayo super..........pennukettunnavanulla munnariyipanennuthonunnu..hahaha

jayanEvoor said...

അല്ല സത്യത്തിൽ അച്ചായനന്ന് എത്ര ഇടി കിട്ടി!?
സാരമില്ല.
അവളൂ പോട്ടെന്ന്‌!!

പാവം വൈദ്യന്‍ said...

ഓഹോ, അപ്പ അപ്പച്ചനാണ് ഈ സാഗര്‍ കോട്ട പുറത്തിന് ഈ പെണ്ണുങ്ങടെ കഥയൊക്കെ പറഞ്ഞു കൊടുക്കുന്നത് ?
ചുമ്മാതല്ല............
:)

റിയാസ് (മിഴിനീര്‍ത്തുള്ളി) said...

അതു ശരി
അപ്പോ ഇതാണു കയ്യിലിരിപ്പ് ല്ലേ...?
കൊള്ളാം...തൊമ്മന്റെ രണ്ടാമത്തെ കെട്ടിന്റെ കഥക്കായി കാത്തിരിക്കുന്നു..

faisu madeena said...

ആ മൊബൈല്‍ നമ്പര്‍ ഒന്ന് തര്യോ ..അല്ലാ ഈ വിളിക്കുന്നവര്‍ക്ക് എല്ലാവര്ക്കും ഈ സര്‍വീസ്‌ ഉണ്ടോ ..

കൊള്ളാം

appachanozhakkal said...

@Anonymous said...
@jayanEvoor said...
@പാവം വൈദ്യന്‍ said...
@റിയാസ് (മിഴിനീര്‍ത്തുള്ളി) said...
@faisu madeena said...

ഇവിടെ വന്നു എന്നെ അനുഗ്രഹിച്ച എല്ലാവര്ക്കും നന്ദി. തമാശക്ക് വേണ്ടി ഞാന്‍ എഴുതിയതാണെങ്കിലും, 'തൊമ്മന്റെ കഥ' ഒരു യഥാര്‍ത്ഥ സംഭവമാണ്. രണ്ടാം ഭാഗം ഇതിലും ദാരുണമാണ്. അത് കൊണ്ട് തന്നെ, രണ്ടാം ഭാഗം എഴുതുന്നതിനെക്കുറിച്ച്, ഒരു പുനര്‍ചിന്തനം ഞാന്‍ നടത്തിക്കൊണ്ടിരിക്കുകയാണ്.

Echmukutty said...

punnyalanmaar police lum undennu kett santhoshiykkunnu.

narmmam nannai.

jazmikkutty said...

ഇതിലെ 'തൊമ്മന്‍' സ്വന്തക്കാര്‍ വല്ലതുമാണോ? നല്ല നര്‍മ്മ കഥ...

jazmikkutty said...

ഇതിലെ 'തൊമ്മന്‍' സ്വന്തക്കാര്‍ വല്ലതുമാണോ? നല്ല നര്‍മ്മ കഥ...

ആളവന്‍താന്‍ said...

ഓഹോ അപ്പൊ കഥ വേണമെങ്കില്‍ അപ്പച്ചന് ഒരു ഫോം ഫില്‍ ചെയ്തു തന്നാ മതിയല്ലേ.... അപ്പൊ ഇനി അടുത്ത ചാന്‍സ്‌ എനിക്ക് തന്നെക്കണേ....! ചുമ്മാ...

Areekkodan | അരീക്കോടന്‍ said...

അപ്പച്ചേട്ടാ....

Villagemaan said...

അപ്പച്ചാ..പോലീസുകാര്‍ക്കെന്താ ഈ വീട്ടില്‍ കാര്യം എന്ന് തൊമ്മന് ചോദിക്കാര്‍ന്നല്ലോ..
ഓ...വീട്ടില്‍ വെച്ചലല്ലോ ഇടി കിട്ടിയത് അല്ലെ .. ഹി ഹി

കൊള്ളാം ട്ടോ...അട്ടുത്ത ഭാഗം എന്നാ വരുന്നേ ?

Mohamedkutty മുഹമ്മദുകുട്ടി said...

നര്‍മ്മം അസ്സലായി. സാഗറില്ലാതെ തന്നെ കഥ കലക്കിയിട്ടുണ്ട്. പിന്നെ പുതിയൊരു ശൈലി എന്നു വേണമെങ്കില്‍ പറയാം. പിന്നൊരു കാര്യം ലേ ഔട്ടും ടെമ്പ്ലേറ്റുമൊക്കെ അടിയന്തിരമായി മാറ്റണം. എന്തൊക്കെയോ പന്തി കേടു തോന്നുന്നു. കമന്റിടാനും മറ്റും താമസം വരുന്നു. ആ മുന്തിരിക്കുലയെല്ലാം ലോഡാവാന്‍ സമയമെടുക്കും!

ente lokam said...

പോലീസ് കാരില്‍ നിന്നും രക്ഷിക്കുന്ന punyalanmaar
ഇല്ലെങ്കിലും പോലീസ് കാരില്‍ ചില punyalanmaar ഉണ്ടെന്നു
മനസ്സിലായി.......രസിച്ചു...

Indiamenon said...

അച്ചായോ ,
കഥ അസ്സലായിട്ടോ.

appachanozhakkal said...

എല്ലാവരോടും കൂടി,
നിങ്ങളെല്ലാവരുടെയും, ഊഷ്മളമായ സന്ദര്‍ശനങ്ങളും, വിലയേറിയ അഭിപ്രായങ്ങളും, നിസ്വാര്തമായ അഭിനന്ദനങ്ങളും എന്നെ ലഹരി പിടിപ്പിക്കുന്നു. കൂടുതല്‍ എഴുതാന്‍ എന്നെ പ്രചോദിപ്പിക്കുന്നു, പ്രലോഭിപ്പിക്കുന്നു. എല്ലാവര്ക്കും ഹൃദയപൂര്‍വ്വം നന്ദി രേഖപ്പെടുത്തട്ടെ. വീണ്ടും ഈ സാമീപ്യം ഞാന്‍ പ്രതീക്ഷിക്കുന്നു.

Sathyan said...

mintathe povan pattumo? Appachantethalle thamasha. Ellam onninonnu mecham. Kootuthal pratheekshikkunnu. Ezhuthi ezhuthi theliyatte.

Sathyanarayanan.K

മുരളീമുകുന്ദൻ ബിലാത്തിപട്ടണം BILATTHIPATTANAM. said...

അപ്പോൾ സാഗറായിട്ട് വല്ല്യേകൂട്ടാല്ലേ...
ആ ഗെഡിയൊട് കഥ പറഞ്ഞ രീതി കലക്കിട്ടാ..

നിത്യ സംഭവാമി യുഗേ യുഗേകൾ...!

appachanozhakkal said...

പ്രിയ സുഹൃത്തുക്കളെ,
ഞാനിങ്ങനെയൊരു ബ്ലോഗ്‌ എഴുതുമെന്നും, നിങ്ങളെപ്പോലെയുള്ളവരുടെ, ഹൃദയംഗമമായ പ്രോത്സാഹനങ്ങള്‍ കിട്ടുമെന്നും,സ്വപ്നത്തില്‍പ്പോലും പ്രതീക്ഷിച്ചിരുന്നില്ല. അതിനു മാത്രമുള്ളയോഗ്യതകളും എനിക്കില്ല. നിങ്ങളുടെയെല്ലാം ഈ പ്രോത്സാഹനങ്ങള്‍, എനിക്കു വലിയ ഒരു ബഹുമതിയാണ്. ഒത്തിരി നന്ദിയുണ്ട്. ഇവിടെ വന്നു എന്റെ ബ്ലോഗ്‌ വായിച്ച്, ആത്മാര്‍ത്ഥമായിട്ട് കമന്റ് എഴുതുകയും,അഭിനന്ദിച്ചു പ്രോത്സാഹിപ്പിക്കുകയും ചെയ്ത, എല്ലാ സഹൃദയരോടും ഞാന്‍ നന്ദി പ്രകടിപ്പിക്കുന്നു. ആറു മാസത്തെ എന്റെ ബ്ലോഗിംഗ് ജീവിതത്തിലുണ്ടായ സമഗ്ര പുരോഗതിക്കും, ഞാന്‍ നിങ്ങളെല്ലാവരോടും കടപ്പെട്ടിരിക്കുന്നു, എന്ന് പ്രത്യേകം ഓര്‍മ്മിക്കുന്നു.